Nostre Nation qui a tousiours esté belliqueuse,
qui a fait trembler toute la terre, & qui n’a iamais
consacré que des Heros, ne peut pas obeïr aux caprices
de ces petites gens, qui ne connoissent ny
ordre ny Police, & qui n’ont esté engendrez que
par les vlceres & la corruption de l’Estat.

La guerre est donc honneste. C’est contre les
Tyrans, c’est contre les Scelerats, c’est contre des
traistres à leur Patrie & à leur honneur, qui veulent
couronner vn Estranger au prejudice des Princes
legitimes, qui se veulent rendre Maistres de l’Estat
pour en chasser nos Princes du Sang & tous les
Grands du Royaume.

Mais si la guerre est honneste contre le Mazarin
& ceux qui le protegent : elle est encore plus iuste.

La France n’est gouuernée que par la resolution
des trois Estats assemblez, par des Declarations verifiées
auec liberté de suffrages, & par l’authorité
des Parlemens.

Tout ce qui est estably par l’vne de ces trois
puissances est inuiolable parmy nous. Les Estats
ordonnoient autrefois par vne puissance legitime,
Ils le pourront encore quand ils voudront, on ne
prescrit iamais contre le Droict puplic & les Loix
fondamentales du Royaume.

Le Roy le peut aussi par ses Declarations verifiées.

Pour les Parlemens ils ne font pas de Loix nouuelles,
mais ils maintiennent celles qui sont desia
faites. Ils en conseruent l’authorité & la vigueur.