violẽce qu’on fait à toutes les Loix de l’Estat, à tous
les ordres publics, aux sermens les plus solemnels,
& aux paroles les plus sacrées. Il n’y a point de Paix
auec vn homme qui ne connoist point de Iustice,
& qui l’a tant de fois violée. Il n’est venu que pour
la destruction de cette Monarchie, & non pas pour
son repos. Il a tousiours mis sa grandeur dans la
confusion & dans le desordre.

Il n’y a donc plus de salut qu’en luy faisant la
guerre, & en l’exterminant tout à fait. C’est le sentiment
de tous les gens de biens.

Cette guerre est honneste, elle est iuste, elle est
necessaire, elle est vtile & aduantageuse à l’Estat.

Elle est honneste, par ce qu’il est honteux de
souffrir la domination d’vn Estranger, qui est mesme
sans naissance, sans foy & sans honneur. Il est
honteux de souffrir que toutes nos Loix soient renuersées
par l’insolence & la temerité d’vn faquin.

Nostre Histoire passeroit sans doute quelque
iour pour vne fable, si apres tant d’Arrests & de Declarations
verifiées, si apres l’vnion de tous les Parlemens
& de tous les Peuples du Royaume pour la
deffaite du Cardinal Mazarin, on voyoit tout cela
s’esuanouïr dans vn moment comme vn songe.

Nous serions le scandale & l’opprobre de tous
les Peuples du monde, si nous n’auions point d’autres
Loix ny d’autre Conseil d’Estat, que les mouuemens
ridicules d’vn Brachet & d’vn Barret, qui
n’ont rien à perdre qu’vne vie infame, remplie d’abominations
& de crimes.