d’vn infame. Vous estes la troisiesme personne
de France. Considerez de qui vous estes, & ce
que vous pouuez faire. Ne souffrez plus qu’on
vende vostre consentement dans des choses
iniques & desraisonnables. Ne souffrez-plus
que toute la France murmure innocemment
de vos bontez. Chassez d’aupres de V. A. R.
les ennemis du Roy, les vostres, & de l’Estat.
Oüy Monseigneur, ce sont vos ennemis ; &
toutes les soubsmissions qu’ils font à V. A. R.
sont autant de pieges qu’ils luy tendent, pour
la surprendre. Vous estes François, & eux ils
veulent destruire & ruiner la France. Vous
estes Prince, & eux veulent vous oster vostre
bien, & vous mettre en mauuaise intelligence
auec vos fidelles compatriotes. Ie crois que si
V. A. R. lit cecy sans estre preoccupée d’ailleurs,
elle y reconnoistra la verité, meslée auec
le zele de celuy qui est veritablement,

MONSEIGNEVR.

De Paris, ce 22.
Fevrier 1649.

De V.A.R. le tres-humble
tres-obeïssant, & tres-fidelle
seruiteur.