vostre innocence. On sçait qu’il n’a autre ambition
que pour luy, & que le seruice de V. A. R.
luy est aussi indiferent qu’vne Comedie. On
sçait qu’il est monté iusques à cét insolence,
que d’imiter l’enfant gasté, & de mespriser sa
mere, ses freres, & ses parents ; Sa naissance est
connuë à tout le monde, comme fils d’vn petit
artizan de la rue S. Honoré ; & tous croyent
que s’il a preoccupé V. A. R. ç’a esté auec des
charmes & mille subtilitez magiques.

D’ailleurs vostre bonté, Monseigneur, est
nuisible à ceux qui vous appartiennent, au nõbre
desquels ie ne mettray point Madame vostre
tres-auguste & tres-vertueuse espouse, non
plus que Mademoiselle vostre tres-belle, tres-sage,
& tres-genereuse fille, bien que elles doiuent
auoir vn grandissime déplaisir de voir que
vous touchant de si pres, elles doiuent dépendre
en quelque façon d’vn si abiet & si vil personnage.
Mais ie parleray de tous vos domestiques,
qui apres auoir consumé leurs biens, leurs
temps, & leurs fortunes, aupres de vostre
A. R. n’en reçoiuent autre recompense,
que d’estre chassez honteusement par cét infame,
lors qu’il luy demandent le payement de