inclinations que nous sucçons auec le laict de nos
nourrices, & nous abstenir de tout ce qui nous
peut faire croire fourbe & trompeur, auec d’autant
plus de soin que vous estes paruenu à vne fortune
inesperée, qui vous conduit auec vne infinité de
sortes de personnes qui se souviennent plus volontiers
du mal que du bien. Souuenez-vous, mon
fils, que vous estes venu d’vn homme de neant, que
vous ne sçauriez trop vous humilier, & que vous
auez commencé par vn degré fort bas pour monter
au haut sommet de la fortune où vous estes
maintenant ; & apprehendez que vostre bastiment
qui est haut eleué sur vn si fragile fondement, ne
succombe & ne vous brise en mille pieces auec les
restes de la famille, en tombant par terre.

Les principales & les plus importantes choses
que i’entends dire de vous, sont, que toute la France
se plaint que vous n’y auez pas encor obligé vn
homme de bonne grace & de bonne foy, qu vn
seul, encor dit on que ce ne fut que par vne extréme
necessité, & pour le bien de vostre auancement
& de vostre conseruation ; que les bien faits qui
dependent de la liberalité du Roy & de la Reyne
Regente (que vous auez l’honneur de seruir) dont
vous estes le dispensateur par vne pure vsurpation
iniuste & violente, ne se distribuë à personne gratuitement,
que vous en faites vn infame commerce,
principalement à l’esgard des Benefice, que
vous ne les donnez point sans en tirer quelque
pension, ou vous en seruir pour excroquer quelque