Où l’on fait des Leçons estranges
Tant de blasmes que de loüanges,
Du déplaisir, & du bon-heur,
De l’infortune, & de l’honneur.
En la Cour l’on trouue sept Classes
Esgallement hautes & basses,
Où l’on apprend en mesme temps
Les diuers subiects inconstans
Du Destin, & de la Fortune,
Qui n’est point égale & commune.
Ces sept Classes ont des objets
Autant diuers que leurs projets :
Aussi sept diuerses Sciences
Y font voir leurs rares puissances,
Ou plustost sept Arts Liberaux,
Qui sont en vn poinct tres-esgaux
C’est que tousiours leurs vrays preceptes
Sont expliquez sans interpretes,
Ils sont plains d’aigreur, de douceur,
Et le temps est leur Professeur.

Le premier des Arts Liberaux.