Les armées n’ont tant de huttes,
Les cabarets n’ont tant de pots,
La Picardie tant de sots,
Les possedez tant de grimaces,
Venise n’a point tant de glaces,
Les Iuges n’ont tant de placets,
Les chicaneurs tant de procez,
Le port au foing tant de canailles,
Ny les Cagouts tant de medailles,
Sedan n’a point tant de pistolets,
L’Auuergne n’a tant de mulets,
Le feu n’a point tant d’estincelles,
Et les Cloistres tant de pucelles,
Le siecle n’a tant d’esprits forts,
Et les luts n’ont point tant d’accords.
Les charlatans n’ont tant de drogues
Et l’Angleterre tant de dogues,
Mayence n’a tant de iambons,
Les forges n’ont tant de charbons,
Les pantalons tant de sonnettes,
Ny les bouffons tant de sornettes,
Les rentes n’ont tant d’interests,
La Cour n’a tant donné d’Arrests.
Apollon n’a tant rendu d’oracles,
Ny les Saints tant fait de miracles.
La vigne n’a tant de bourgeons,
Les colombiers tant de pigeons,
Vn Notaire tant de paraffes,
Ny Saint Denis tant d’Epitaphes.
Les bordels n’ont tant de putains,
Vn four aban tant cuit de pains,
L’Hostel-Dieu n’a tant de malades,
Ny les iardins tant de salades :
Les palais n’ont tant de plaideurs,
Ny l’Arabie tant d’odeurs.

Page précédent(e)

Page suivant(e)