à sçauoir, Baillifs & Seneschaux, se iugeoient
par le Roy seant en son lict de Iustice, au lieu
où il se trouuoit pour lors, ou en quelque autre ville
designée par sa Majesté aux iours de S. Martin, à la
Pẽtecoste & autres iours de l’année, selon l’occurẽce,
ou la necessité des affaires. Or ce que nous appellons
Parlement, s’appelloit pour lors le grand Conseil
du Roy, & ce grand Conseil ou Parlement estoit
composé des Ducs & Pairs de France, des Cheualiers,
des Conseillers d’Estat du Roy, & des Maistres
des Requestes de son Hostel, qui lors n’estoient
que quatre, & dans ce Conseil se terminoient tous
les differends. Et maintenant encor quand le Roy
de France tient seance en son lict de Iustice, le Parlement
est composé des mesmes personnes qu’il
estoit auparauant qu’il fut sedentaire ; Neantmoins,
bien que le Parlement soit resident à Paris, cela
n’empesche pas qu’il ne puisse estre ailleurs pour de
puissantes raisons d’Estat, & pour le seruice du Roy,
comme nous remarquons dans l’histoire de France
qu’il fust à Chaalons du temps de Philippes le Bel,
à Tours du temps d’Henry III. & à Poictiers du
temps d’Henry IV. Mais ce n’est rien dire de cet
auguste Senat : qui fait la plus saine & la meilleure
partie de la France, qu’il ait esté estably des Roys, &
maintenu par leur authorité Souueraine ; Si nous no
faisons voir dans la suitte des Regnes les extrémes
obligations que les Monarques de France luy ont
eu de tout temps, comme à celui qui aux despens de
ses biens, de sa liberté, de sa vie, a maintenu l’autorité

Page précédent(e)

Page suivant(e)