du glaiue des Conspirateurs, moy qui suis mortellement
hay de tous, & que chacun iette sur moy la naissance
& la suitte des troubles ciuiles du Royaume, qui ont
esté entreprises par mes conseils, en quel lieu pourrois-je
estre asseuré de ma vie, puisque dans les Palais & au milieu
d’vne grande ville de Paris, à la veüe de tant de gardes
& de peuples, deux Roys de France ont proditoirement
esté tuez par deux scelerats.

La Reyne, Monsieur, puisque vous ne trouuez vostre
personne asseurée prés celle du Roy, il faut vous resoudre
à garder la chambre sans parler, à qui que ce soit par le truchement
& entremise de quelques-vns des vostres, qui seront
tousiours prés de vous & sans armes pour oster la défiance
que vous aurez d’eux, sans permettre qu’aucun autre
vous approche. Ainsi nul ne va à l’Audience du grand
Seigneur en sa chambre, soit Ambassadeurs ou autres qu’il
ne soit conduit & soustenu par dessous les bras, & faut qu’il
parle d’assez loing du throsne Imperial de sa hautesse ; apres
son Audience il est rammené, ainsi conduit par dessous les
bras iusques hors sa chambre, tant la deffiance est grande
parmy eux.

Mazarin, Madame, ie croy estre plus asseuré en mettant
ma personne en la garde des Italiens, que ie cognois
m’estre fideles, quoy que traistres à d’autres selon leur
nation, & que ie les ay obligez par les grands biens que ie
leur ay faits, & pour m’en asseurer encore dauantage ie ne
les veux tenir prés de moy auec des armes, & sans sortir
de ma chambre que pour leurs necessitez, & seront obseruez
à chaque pas qu’ils feront ; c’est ce que ie peu faire,
car de changer de sejour ie baillerois plus de prise à mes
hayneux sur moy, qu’au lieu ou ie me trouue, quoy que
peu asseuré, & voudrois estre à cent lieuës de France.

La Reyne, Monsieur, ie croy que c’est auec raison que
trouuez vostre seureté plus grande parmy les Italiens