Le Roy. Il me fera bien plaisir de ne me point aborder,
car ie l’ayme encore moins que ie faisois.

Monsieur. Mon petit papa, il ne faut pas dire cela,
car s’il sçauoit que vous & moy nous ne l’aimons
pas, il nous ensorceleroit pour se faire aimer.

Le Roy. Ie luy veux faire bonne mine, mais ie luy
feray mauuais ieu, ou ie ne pourray.

Monsieur. Vous ferez bien, mon petit papa, pour
moy ie luy en veux faire autant.

Le Roy. Mais d’où vient que nous ne retournons
pas à Paris.

Monsieur. C’est que ma bonne maman a fait assieger
Paris.

Le Roy. Elle l’a fait assieger.

Monsieur. Ouy vrayment.

Le Roy. Et que croit-elle donc de faire,

Monsieur. Elle croit les faire mourir de faim.

Le Roy. Mais que dit-on de ce siege ?

Monsieur. On dit que ma bonne maman n’y fera
que sang & eau.

Le Roy. Comment,

Monsieur. On dit qu’elle n’y fera rien.

Le Roy. Tant mieux, i’en seray bien aise, comment
n’en fera-t’elle rien.

Monsieur. C’est qu’on dit, qu’ils sont plus forts
qu’elle.