monstres aquatiques obeïssent à la Baleine :
dans l’Air, les oiseaux obeïssent à l’Aigle : les
Loups, les Tigres, les Leopards & les Pantheres
reconnoissent le Lion pour leur Souuerain :
les Insectes mesmes, comme les mouches à miel,
rendent vne obeïssance si parfaite à leur Roy,
qu’elles le nourrissent, & exposent leurs vies
pour sa defense. Les Sauuages ont vn Roy : les
larrons mesme dans les bois, élisent sur eux vn
Souuerain : Bref & le Ciel & la Terre reconnoissent
vne seule Diuinité. Ce maudit Peuple
seul ne veut point de Roy, il est ennemy de toute
Souueraineté, & contre les Loix & diuines
& humaines ne peut souffrir de Superieur, ny
au temporel, ny au spirituel. Que mon exemple
vous serue seulement à vous preparer à la
mort : car ayant tué le Pere, leur inhumanité ne
pardonnera pas aux Enfans. Ie suis aussi innocent
que vous, mourez aussi courageusement
que moy. Que la vigueur de ce noble Sang &
de Bourbon & de Stuart, fasse paroistre sa generosité :
il vaut mieux mourir ieune, que de suruiure
à vostre honneur. Ces spectacles affreux
& des bourreaux, & des glaiues, ne rendent pas
la mort honteuse aux innocens, pourueu qu’ils
l’affrontent auec cœur. Les Anglois n’empourprent
leurs eschaffauts que de ce noble sang, il y

Page précédent(e)

Page suivant(e)