Questier, Mathurin, dit Fort-Lys [1649], LE IOVRNAL POETIQVE DE LA GVERRE PARISIENNE. Dedié aux Conseruateurs du Roy, des Loix, & de la Patrie. Par M. QVESTIER, dit FORT-LYS. , françaisRéférence RIM : M0_1763. Cote locale : C_4_38_01.
Page précédent(e)

Page suivant(e)

-- 5 --


En disant ; Quoy faut-il nous traitter de la sorte ?
Et l’autre demandoit par où, par quelle porte
Ce Roy donné du Ciel pouuoit estre sorty
En maudissant l’autheur d’vn si fascheux party.
Les femmes demandoiẽt, Qu’est-ce qu’on nous demande ?
Nos fideles maris, payeront-ils l’amande
Quoy nous faut-il mourir pour vn rouge Estranger ?
Quoy faut-il que son ieu cause nostre danger ?
Que son cœur orgueilleux enfanté de l’enuie
Rampe parmy ces lieux pour nous oster la vie ?
Non, non, il faut purger Paris des vicieux,
Et nous appaiserons la colere des Cieux.

 

 


Lors la seconde nuict commença & le vent
Fit beaucoup plus de bruit qu’il n’auoit fait deuant,
Chacun s’en va coucher horsmis quelques gensd’armes,
Qui auec Diane veillent dessous les armes ;
L’on entend bien crier ; demeure, qui va là ;
Caporal, hors de garde ; i’ay veu cy, ou cela ;
Vn blesme Cauallier c’est montré à ma face,
Qui vous voyant venir m’a delaissé la place.

 

 


Cecy causa vn cry ; arme, arme compagnons ;
Et ie vis naistre alors beaucoup de champignons,
Que l’on croyoit pourris au centre de la terre,
Et qui ne demandoient qu’à soustenir la guerre.
Dés lors le Parlement se couurant du bonnet
Qui sçait punir le crime & rendre le franc net,
Quoy qu’il soit oppressé. Si les Cieux sont pour nous,
Nous luy deuons ployer maintenant les genoux.
Non, ce n’est pas au Ciel, c’est vne creature,
Puis qu’il porte sur soy de l’homme la figure.
Page précédent(e)

Page suivant(e)

Questier, Mathurin, dit Fort-Lys [1649], LE IOVRNAL POETIQVE DE LA GVERRE PARISIENNE. Dedié aux Conseruateurs du Roy, des Loix, & de la Patrie. Par M. QVESTIER, dit FORT-LYS. , françaisRéférence RIM : M0_1763. Cote locale : C_4_38_01.