du dernier homme que i’estois d’vne terre si
esloignee & si odieuse, quelle vie ay je menee,
quelle est la gloire de mes actions, quelle est la
Noblesse de mon pere, pour estre deuenu Parain
du Roy regnant, à la veuë de tous les Princes ? est-ce
la suite d’vne vie infame, & d’vne si incroyable
extraction. Il n’auoit pas vne seule bonne qualité :
le vulgaire mesme sçauoit que c’estoit le plus
ignorant, & le plus ingrat de tous les hommes : il
le méprisoit, & les Princes, quoy qu’indignement
traittez l’honoroient. Ce Prince de Condé, qui
faisoit lascher pied aux plus formidables Armées,
qui faisoit trembler les Prouinces, les Rois, &
mesmes les Empereurs, venoit fléchir le genoüil
deuant cette Idole de verre, & lui faire hommage
de ses triomphes ; quoy qu’il les eust gaignez
par vne valeur singuliere ; quoy qu’il sceut que
l’autre en empeschast les fruicts, & qu’il trauersast
sa fortune & sa reputation par vne malice inconceuable.

C’est à ce Prince, Monseigneur, à qui vous
deuez parler comme à vostre pupille, qu’il faut
que vous appreniez le tort qu’il s’est fait d’auoir
mesprisé l’adoration d’vne Nation entiere, &
d’auoir fait comme à l’enuy tout ce qu’vn Roy
pourroit attenter pour perdre l’affection & l’amour
de tous ses Sujets, par le feu, par le fer, par
les viols & les sacrileges. Nous n’auons rien de