ont esté contraints d’aller viure à credit. N’estoit-ce
pas vne vision du ciel qui nous aduertissoit, que
la France épuisee, ne pouuoit plus fournir à la table,
& à la maison d’vn Roy legitime & d’vn Tyran.
Ie l’ay veu monter & descendre en chaire, &
sur les espaules des François l’escalier du Roy : ie
l’ay veu conduite dans ce triomphe Papal & Pontifical,
par la plus illustre & la plus lasche Noblesse
de France, qui se pressoit pour estre veuë, & ie vous
confesse, Monseigneur, que ie craignois d’auoir la
honte d’estre veu moy mesme, quoy que sous vn
habit de Religion & d’humilité. Nous estions
deux de nostre Ordre que l’on auoit demandez à
la Cour, pour la nouueauté de nostre Regle : nous
venions tous deux d’Italie, tous deux connoissiõs
le merite & la naissance du personnage : Enfin
tous deux à mesme temps nous rencontrasmes
dans ce sentiment de lui reprocher en nostre interieur
cette humilité de Dauid, qui disoit en admirant
sa fortune, Quis ego sum aut qua est vita mea,
aut cognatio patris mei in Israël, vt fiam gener Regis.
Reg l 1. Qui suis je, quel est l’honneur de ma vie, de
quelle consideration peut estre la parente de mon pere
parmy les Tribus, pour me rendre digne d’estre gendre
du Roy ?

Est il possible que le Cardinal Mazarin ne soit
pas mille fois rentré dans l’admiration de sa fortune,
& qu’il ne se soit pas écrié : Que suis je deuenu ;