toute liberté de nous faire ressentir les effects d’vne
rigoureuse vengeance ? Que nous poursuiuons
qu’il vienne regner sur le Throsne des François en
successeur des Louys, & que vous pretendez qu’il n’y
remontera iamais que pour y commander en grand
Seigneur.

Ah ! Messieurs que cette conduite seroit fatale à
sa Majesté, si nous n’estions parfaictement conuaincus,
que ce beau Prince le plus innocent de tous
ceux que nous auons veu sur le Throsne, n’agit en
cette conioncture que par les impressions estrangeres
que vous donnez à la tendresse de son esprit. Si
nous estions aussi lasches pour porter toutes choses à
l’extremité, que vous estes violents pour nous irriter ;
nous serions plus en estat de vous faire trembler,
que vous n’estes en droict d’exiger de nostre fidelité,
ces extrauagantes soumissions que les predecesseurs
de sa Majesté n’ont iamais exigé de leurs Subiects.
Mais vous auez beau faire, vous pouuez bien l’esloigner
de nostre presence, mais vous ne l’esloignerez
iamais de nos cœurs : fut il à cent lieuës de nous,
nous le regarderons tousiours comme nostre Souuerain.
Et nous nous soumettrons tousiours à ses Ordres,
lors que nous reconnoistrons par leur iustice,
qu’ils viendront de sa Majesté.

Mais tandis que nous entendrons que le Roy ne
peut point trouuer ses seuretez à Paris pendant que