puis que c’est vn effet de cette premiere
cause, qui éleue & détruit ceux qu’il
luy plaist ; & ce n’est pas à nous de penetrer ses
jugemens, il est souuerain & tres-parfaitement
equitable en toutes ses œuures.

Tite-Liue raconte qu’il y auoit vn peuple
qui se disoit Equitili, qui se declara ennemi
des Romains. Municius Consul desja nommé
fut Commis par le Senat pour les aller combattre,
quand il les approcha il assembla toutes
ses Trouppes qui estoient en grand nombre,
& ayant appris les forces de ces ennemis,
qui estoient plus grandes que les siennes,
il se fit fermer des fossez, & resolut de les attendre,
se trouuant trop foible pour les aller assaillir,
il s’estoit fortifié le plus qu’il luy auoit
esté possible, & se tenoit dans son fort pour
euiter le dommage ; cependant il écriuit au
Senat pour demander du secours, mais sa precaution
ne luy fut pas fauorable, les ennemis
le viennent assieger si rudement, qu’il est en
extresme peril ; le Senat ne voulant point perdre
son armee, ils en mettent vne sus pied tres-magnifique,
mais pour la conduire il ne se
trouua personne de capable : Il fut aduisé de
faire vn Dictateur, qui estoit quelque espece
de Souueraineté sur tous les autres, & pour ses
charges il n’estoit besoin ny de richesse ny de