qui vous rend comme esclaue aux liens où vous
deuez auoir le souuerain commandement. Mais
quoy ? pensez-vous que vos propres sujets ne
vous méprisent, & ne vous hayssent à la fin,
voyans que vous les priuez par ce funeste attachement
aux interests d’vn pernicieux Estranger,
de ce qui leur auoit cousté tant de sang, tant de
peines, & tant de thresors ? ne craignez-vous
point d’irriter mes manes, perdant presque auec
indifference ce que i’aimay si tendrement, & ce
qui occupa tout le temps de ma vie au dessein de
me l’acquerir ? Serez-vous comme l’Empereur
Arcadius, qui ioüant aux dez en la ville de Rauenne,
lors qu’on luy rapporta que Rome estoit
prise, cette Rome si fameuse par toute la terre,
& que les Goths auoient assiegée depuis deux
ans, crût que ce discours s’entendoit d’vn des
siens, qui portoit ce nom, & auec lequel il s’estoit
agreablemẽt diuerty le soir precedent, & tesmoigna
qu’il en sentoit beaucoup d’affliction, & sçachant
que c’estoit de la ville de Rome, qu’on luy
faisoit ce rapport, n’en fist paroistre aucun sentiment
de douleur, qui l’empeschast de continuer
son jeu comme auparauant. Ainsi tesmoignerez-vous
du desplaisir pour quelque disgrace de
quelqu’vn de ceux qui s’exercent auec vous aux
petits ieux où l’on vous accuse de paroistre trop
addonné ? & n’aurez-vous que de l’indifference
pour les pertes de Graueline, de Dunkerque, de

Page précédent(e)

Page suivant(e)