Rome, où il ne manqua pas d’estre accusé de la
mort de Germanicus par sa veufue & les amis du
deffunt, & comme il taschoit à se deffendre par
l’insuffisance des preuues & des conjectures qu’on
employoit contre luy, l’imputation de cette guerre
faite en la Syrie acheua de le confondre, tant
ce point est chastoüilleux, & important.

Vtque reus
agi posset
bello victum Tacit.

Ie ne doute point que Mazarin ne se preuale
tousiours du pretexte de vostre interest,
qu’il feint d’auoir soustenu dans ces deux guerres :
Mais ie vous ay bien fait voir que ce qui
redouble son crime, est de vous interesser dans
ce qui le touche, & de se couurir du manteau de
vostre autorité, pour ruiner vostre Couronne &;
vostre Estat, & vous exposer vous mesme au peril
de tomber entre les mains de vos ennemis.
Ainsi, MON FILS, ie vous voy reduit auec
douleur à cette fatale extremité, de le perdre, ou
de regarder vostre perte comme infaillible, & d’estre
aussi le spectateur des desordres & des ruines
de vostre Empire, comme il est l’artisan de vostre
malheur. C’est à vous maintenant de choisir
& de voir si vous aimez mieux tout perdre pour
l’amour de luy, que de perdre vn miserable qui
vous perd.

Au reste, MON FILS, iusques icy ie vous
ay seulement formé l’idée d’vn parfait Ministre,
& monstré les defauts & les crimes du vostre,
pour vous faire voir de quel punition il s’est rendu