Rien ne suffit à l’auarice de vostre Ministre,
parce que sa fortune mal-asseurée a besoin de
beaucoup d’appuis pour la soustenir, comparable
à ces mauuais corps, qui consomment beaucoup
d’alimens sans en paroistre, ou plus frais,
ou plus robustes, par ce que leur foye trop chaud,
& leur estomac trop auide, bien que foible &
disgracié, conuertit tout en cruditez indigestes,
qui sont les veritables semences des maladies.
Aussi mauuais Philosophe que Politique, il n’a
iamais appris à mettre de bornes à ses desirs, &
ne connoist des deuoirs que celuy qui nous oblige
à prendre soin de nostre propre indiuidu. Son
ambition qui tient son esprit tousiours en l’air,
se mesure aux faueurs qu’il reçoit de la fortune;
& pour s’establir puissamment, veut qu’il parroisse
insatiable dans le soin d’amasser des richesses
& des tresors. L’ordre qu’il ignore, & la iustice
qu’il refuse de pratiquer, font que les biens
s’escoulent aussi-tost d’entre ces mains, par les
mouuemens de sa crainte, qui le force souuent à
paroistre prodigue de ce qui est l’idole de ses desirs.
Il se fait craindre aux François, par ce qu’il
craint tousiours luy-mesme ; & les maux qu’il a
fait par le passé, l’obligent d’en faire encore de
plus grands, pour s’exempter du chastiment
qu’il merite pour ces excez.

Estant entré comme vn singe en cet Estat, il
a d’abord fait l’agneau, puis le renard, & voulant