vostre Compagnie a estimé que pour maintenir la liberté legitime
qui fait regner les Roys dans le cœur des Peuples, il ne
faut pas permettre qu’aucun particulier s’estende en trop grande
puissance, au preiudice de la souueraine : Parce que ses establissemens
sont contraires aux vrayes Regles de bonne Police,
en toute sorte de Gouuernemens : & specialement aux Monarchiques,
qui ont pour Loy fondamentale, qu’il n’y ait qu’vn
Maistre en tiltre & en fonction. Comment auez-vous donc
permis que le Cardinal Mazarin se soit assis dans le Thrône, &
qu’il ait vsurpé nostre Sceptre, aussi imperieusement comme
s’il auoit esté nostre legitime Monarque ?

Vous dites qu’il est arriué que le Cardinal Mazarin esleué
par le Cardinal de Richelieu, nourry dans ses Maximes ambitieuses,
& formé dans ses artifices, succedant à son Ministere, a
succedé pareillement à ses desseins : Qu’il n’a pas plustost eu
l’honneur d’estre admis au maniement des affaires, qu’il n’en ait
abusé, & qu’oubliant son deuoir, & les obligations qu’il auoit à
sa Bien factrice, suiuant l’exemple de celuy qui l’auoit instruict,
il n’ait dressé toute sa conduitte à vsurper la supreme authorité.
De maniere que deslors iusqu’à present, vous l’auez veu Maistre
de la Personne du Roy, sous le nouueau tiltre d’Intendant
de son education : Et disposer sans reserue, des Charges, des
Dignitez, des Places, des Gouuernements, des Armées & des
Finances, conferer toutes les graces, sans donner part de la gratitude
à la Reyne ; ordonner les peines, luy en laissant toute
l’enuie, & qu’en effet tous les subiects du Roy & leurs fortunes
particulieres, aussi bien que la fortune publique, estoient en sa
dependance. Mais quand cela ne seroit point arriué en ceux
qui ont procedé, y auoit-il pas suiet de craindre qu’il n’arriuast
sous la conduitte d’vn Estranger, & d’vn Estranger inconnu, &
d’vn Estranger nay subiect du Roy d’Espagne, auec qui nous
auons actuellement la guerre : Et d’vn Estranger sans aucunes
qualitez Heroïques, telles qu’il les faut pour gouuerner des
Estats ? Et mesme sans aucune qualité considerable, ny par sa
naissance, ny par son esprit, ny par son experience, ny par sa
science, ny par sa pieté, ny par sa beneficence, ny par sa bonté ny
par aucune des vertus qui peuuent rendre vn homme aymable
ou supportable en son gouuernement ? Comment luy abandonner
ce qu’à peine on eust voulu confier au plus grand Personnage