se peut faire autrement que toute l’eau qui en decoule
n’en soit fade & de mauuais goust, de mesme
le Conseil d’vn Prince estant corrompu & infecté,
il aduient tousiours que ce qui en depend
est iniuste, inique, & mauuais, & le contraire.

C’est chose commune, dit Seneque, que és affaires
d’autruy nous voyons plus clair qu’en nos propres
affaires. A raison que l’amour de nous mesmes
nous aueugle. Voyla pourquoy il est requis
sur toutes choses, que vous soyez pourueu d’vn
bon & sage Conseil, & qu’en vos affaires vous
croyez les gens de bien. Et non pas les mondains
Politiques, Machiauelistes, & Atheystes, qui sont
au tour de vous, & qui ont reduit vos affaires,
au miserable estat auquel elles sont à present. Il
faut pour vostre grand bien, que vous appreniez à
hayr mortellement telles gens. Et que non seulement
vous les chassiez arriere de vous, comme indignes
de vous approcher, mais aussi que vous
leur faciez rendre conte des iniustices & pilleries
qui ont esté faites durant leur temps. Et leur faciez
cognoistre que vous auez l’esprit assez bon pour
auoir descouuert les tromperies & flatteries, desquelles
ils vous ont abusé : vous ayant reduit en
telle necessité, que depuis le temps qu’ils vous apprennent
à conduire vos affaires à couuert, & en
toutes choses dissimuler & faire paroistre le contraire
de vostre intention, vous auez esté seruy par
la mesme dissimulation, les volontez de vos Sujets