au temps du siege de Maestrich par les Hollandois
l’an 1633. fut si audacieux que de reprocher
aux Flamands leurs grandes richesses, & qu’ils
pouuoient entretenir la guerre à leurs frais & despens,
sans qu’il fust besoin que le Roy d’Espagne
en fist la despense pour les conseruer, Maestrich
estant pris sans auoir esté secouru par le Marquis
de Saincte Croix Capitaine General pour ce Roy
en Flandres, ny par les soins de ce Cardinal, mit
les Flamands en telle furie contre ce Cardinal,
qu’il fut contraint de sortir du païs, & par toutes
les places par où il passoit en s’en retournant, le
peuple lui reprochant sa lascheté, perfidie & larcins,
iettoient des pierres & de la bouë à son carrosse
à dessein de l’assommer comme ils eussent
fait s’il n’eust vsé de grande diligence.

C’est auiourd’huy ce qui se void en France, où
le peuple armera contre Mazarin, auroit courage
de manger son cœur s’il estoit en leur puissance,
sçachant que luy seul empesche la paix, est cause
que la France est ruinée sans pouuoir plus respirer,
pour le seul desir de contenter son insatiable auarice,
& iouyr de ses mal heureux plaisirs, & qu’il
ne falloit attendre autre traictement de cet Asne
Rouge, lors que pour nostre mal heur, il est entré
au Ministere des affaires.

FIN.