LES HORIBLES CRVAVTEZ
faites dans les Prouinces de France,
par les gens de guerres d’Erlach & autres.
C’Est à ce coup que l’on voit l’Estat deplorable
de la pauure France, a present
delaissée & abandonnée de tout
le Monde, il ny a plus que desespoir
dans les Villes, Bourgs, & Villages
des Prouinces, ce n’est que feu, il ny a que des
pleurs, des gemissements des tortures des viols,
des Martyres, des cruautez abominables exercez
par les gens de guerre du General Erlach & autres,
lesquels sont pires que des Demons, il a inuenté
tous les iours de nouueaux supplices ne se
pouuant soûler du sang des pauures habitans des
villes & villages, ie ne sçay par quel moyen vous
les descrire d’autant qu’ils sont en si grand nombre,
& me trouuant saisi d’vn grand ressentiment,
voyant qu’a present qu’il ny a plus de remede,
l’on a beau crier personne ne peut escouter, le
Diable regne a present dans la France, & a quantité
-- 4 --
de Commis sur terre pour cet effet, lesquels auront
bien tost executé leurs desseins si nous n’auõs
recours à Dieu par nos prieres, le supplier de nous
regarder en pitié, & d’enuoyer à nostre secours
Monsieur saint Michel protecteur de la France,
pour combatre tous ces Commis diaboliques qui
empeschent le repos de nostre bon Roy, & de son
pauure peuple, venez donc grand Guerrier du
Ciel, venez protecteur de la France, nous attendons
vostre secours auec impatience, nous prions
Dieu que ce soit au plustost, Ainsi soit il.
Anonyme [1649],
LES HORRIBLES CRVAVTÉS FAITES DANS LES PROVINCES de France, par les gens de guerres d’Erlach & autres. , français
Référence RIM : M0_1668. Cote locale : C_5_55.