Duval, Jean [?] [1652], LA TROISIESME PARTIE DV PARLEMENT BVRLESQVE. DE PONTHOISE, Contenant la Response à l’Anti-Burlesque du sieur D. L. R. Et le nom & les qualitez de trois nouueaux Renegats. Par l’Autheur de la premiere & seconde Partie. , françaisRéférence RIM : M0_2701. Cote locale : B_15_38.
-- 7 --
L’vn pour Coadiutorerie
S’est mis de cette singerie ;
Vn autre pour vn Euesché
Du bon chemin s’est debauché ;
Vn autre pour vne Abbaye
A sa conscience trahie ;
Morceau pourtant qu’il n’aura pas,
Quoy qu’il en face bien des pas,
Les autres ont gagné le large,
Croyans attrapper quelque charge ;
Se faire Ministres d’Estat,
Quelques autres pour le Ducat ;
Enfin dedans cette demarche,
Rien que leur interest ne marche ;
Et dans leur malheureux trafic,
Ils vendent le bien du public.
Voila quelle est la belle engeance,
Dont tu reclames la clemence.
A propos ie ne disois rien
De tes belles Stances de chien,
Dont le stille est aussi crotesque
Que ton meschant Anti-Burlesque.
Mais reçois vn conseil d’amy.
Qui ne fait pas vn petit ply ;
Ie te dis ne sois plus Poëte,
Car (& ie seray bon Prophete)
Ie te iure par Appollon,
Sa vielle & son violon,
Si ta teste au mestier s’applique,
Que tu deuiendras frenetique ;
Crois moy donc ne t’en mesle plus,
Si tu ne veux estre reclus
Dedans vne petite loge
Où les fous comme toy l’on loge.
FIN.
|