estre innocent, non seulement parce qu’il
est necessaire, mais aussi parce que le secours
que nous auons tiré de l’Estranger est
du tout aduantageux pour le seruice du
Roy, & nullement prejudiciable. Ouy
son Altesse Royale peut dire qu’elle a desarmé
le Roy d’Espagne, ayant obtenu de
sa Majesté Catholique ses troupes pour
faire la guerre au Cardinal Mazarin, auec
des asseurances Royales & certaines, qu’il
ne se fera aucun acte d’hostilité sur aucune
place du Royaume, & que toutes ses forces
seront employées pour destruire le party
Mazarin, & pour conclure le traitté de
Paix, que les conseils de ce Ministre factieux,
b/> ont iusqu’à present eludée. Encores
on pourroit dire auec raison que ce n’est
point les Espagnols, ou les ennemis de l’Estat
que l’on a fait venir en France pour
combattre le party ennemy des Parlemẽts,
& des peuples, puisque ce sont des troupes
ramassées de Soldats de fortune, qui ne
sont point attachées qu’au seruice de ceux
qui les payent, & sont indifferemment
pour les François ou pour les Espagnols,
selon que les vns ou les autres les employẽt.