Louis (XIV), De Guénégaud [signé] [1649 [?]], LETTRES ET DECLARATION DV ROY, SVR LE SVIET DE SA SORTIE DE PARIS. Auec l'Arrest de son Conseil d'Estat, portant cassation de celuy du Parlement de Paris, concernant le logement des Troupes de Sa Majesté. , françaisRéférence RIM : M0_2289. Cote locale : A_1_1.
-- 4 --
autres Cours Souueraines, dequoy ie desire que
vous donniez part à mes Fidelles Sujets de ma
bonne Ville de Paris, en attendant que ie vous face
sçauoir ma resolution sur ces occurrences : Que cependant
vous ayez à vous employer selon l’authorité
de vostre charge, à ce qu’il n’arriue rien en madite
Ville, qui soit préjudiciable à mon seruice, ny
au repos d’icelle, & que vous asseuriez les Preuost
des Marchands & Escheuins, & principaux Habitans,
que demeurants, cõme ils ont fait de leur part
iusqu’à present, dans le deuoir de bons & fidelles
Sujets, ils receuront de Nous la continuation de
tout bon & fauorable traitement : Et sur ce, ie prie
Dieu qu’il vous ait, mon Cousin, en sa sainte & digne
garde.
Escrite à Paris ce cinquiéme iour de Ianuier 1649,
Signé, LOVIS. Et plus bas, DE GVENEGAVD.
Et à la suscription est escrit : A mon Cousin le
Duc de Monbazon, Pair de France, Gouuerneur,
& mon Lieutenant General en ma bonne Ville de
Paris & Isle de France.
|