de les aller trouuer, ny d’approuuer vne occupation
si injuste, Nous supplions vostre Maiesté de considerer
que nous en detestons la cause, en telle sorte que
nous faisons vœu de ne les voir jamais s’ils ne quittent
la protection du Cardinal Mazarin, incontinãt qu’ils
auront sceu nostre resolution. Nous sçauons bien,
Madame, qu’en cette pensée vostre Majesté aura peine
de receuoir nos complimens, mais quoy qu’il en
soit, nous prions Dieu qu’il vous veuille changer le
cœur, & qu’il desille vos yeux afin que vous fassiez
vne notable distinction des Dames veritablement
Françoises d’auec ces hypocrites qui flattent vostre
passion & gastent vostre Cour, alors vous cognoistrez
que nos sentimens sont justes, & que dans les genereuses
plaintes que nous faisons que nous auons
conserué l’honneur, le respect & l’obeïssance telle que
nous deuons à nostre veritable Reyne. Nous sommes,

MADAME,

De vostre Majesté

Tres-humbles, tres-obeïssantes & tres-fidelles
sujettes & seruantes L M. R. L. D. R.
M. N. C. D. R. S. V. A. B. G.