particulierement comptera ses années par celle de
vostre supplice, qui sera celle de sa liberté. Ce sera
pour lors qu’il faudra s’employer nuit & iour a en
faire des Relations auec diuerses figures en taille de
bois, l’on criera vostre descente aux enfers : vostre
rencontre auec le Marquis d’Ancre : vostre entretien
auec Iean Prochyte, qui sonna les Vespres Sicilienes :
les reproches que Monsieur le President Barillon
vous fera du sein d’Abraham : vostre testament
de mort : les regrets de vos Niepces : les consolations
à la Muti, la Martinozzi & la Manzini vos
Sœurs : les iustes reproches de la Seignora Portia Vrsina
à Pietro Mazarini vostre pere, sur l’inégalité de
leur mariage : l’annee Climaterique de la race Mazarine,
contenant le progrez & la fin de la fortune des deux
Cardinaux auec leur apotheose, & autres galanteries
qui se debiteront bonnes ou mauuaises pour les Recueils
que les curieux font de tout ce qui se publie.

Nous esperons que ce supplice sera pareil à celuy
de Saint Iean de Latran nostre principal Patron. Il
a esté le vostre, quand vous auez esté Chanoine de
son Eglise à Rome, la France qui vous donna sa
voix pour cette dignité, que vous ne meritiez pas,
vous condamne reciproquement à la peine qu’il n’auoit
pas meritée. Consolez vous Monseigneur, de ce
qu’elle sera extraordinaire, & que les Cesars & la
plus grande part des personnes Illustres ont fait vne
fin tragique, peut-estre que les tourmens vous feront
plus doux que l’apprehension qui vous bourelle si