falloit couurir de quelque pretexte ce grand armement
d’assassins & de voleurs, auec lesquels il s’en
alloit au Palais pour forcer les sufrages des Iuges par
l’aprehension de ses insultes : cette moderation est-elle
si reguliere. Il estoit à propos d’effacer des esprits
du peuple la creance qu’on a que c’est vn violent &
vn ambitieux qui desoleroit tout l’Estat s’il en auoit
le timon en main ; & qu’on fonde assez raisonnablement
sur cet empressement auec lequel on le voit en
Lutin politique troubler le repos de la nuict, pour
intriguer auec ceux de sa cabale pendant que ces
bons Diocesains le croyent à la meditation dans les
retraites de son Archeuesché.

Ie ne suis pas gagé pour faire voir toutes les violences
du C. de Retz ; Il me suffit d’en auoir est allé
quelques-vnes pour prouuer que sa moderation
n’est pas si reguliere que l’Autheur de son vray semblable
pretend, & que depuis quatre ans pendant lesquels
il a tenu vne des places des plus considerables,
il n’a fait éclater qu’autant de coups de violence
qu’il en a eu d’occasion ; & qu’il en faut à tout homme
de sens pour iuger sans temerité, que le timon de
l’Estat seroit plus dangereusement entre ses mains
qu’entre celles du Mazarin, Comme il ne faut point
douter qu’il restabliroit la tirannie dans sa premiere
rigueur s’il auoit iamais l’honneur d’estre apellé à la
confidence de nostre Souuerain.