Cardinal Mazarin : ils me respondirent que
Pontoise n’estoit pas de deffence, & qu’estans
sans Gouuerneur ils ne pouuoient tenir bon, &
que ç’auoit esté malgré eux qu’il y estoit entré
mais qu’il couroit vn bruit que la Cour n’y sejourneroit
plus gueres, & qu’elle esperoit aller
à Compiegne, mais qu’on auoit mandé au Roy
que la contagion y estoit, c’est ce qui retient sa
Majesté, qui ne sçait tantost plus où aller à cause
du Cardinal Mazarin pour qui elle est si affectionnée,
& ie croy qu’au sortir de Pontoise, si
on ne fait la Paix, que la Cour sera contrainte
de se retirer à S. Germain. Reuenons à Mazarin,
qui est tout éperdu de frayeur par vn prejugé
qu’il fait d’vn mauuais euenement à ses affaires.
Il estoit vn de ces derniers iours si morne
& si pensif, qu il sembloit estre vn corps priué
de vie, & comme il estoit en cét estat, il fut
abordé par vn vieux Gentil-homme Breton
appellé le sieur des Forests, qui confera auec
luy quelque temps, & luy dit d’abord,

MONSIEVR, D’où vient que vostre
Eminence paroist si troublée, ie vous
trouue grandement changé, que vous peut-il
estre suruenu qui vous fait auoir l’esprit si abattu,