Le Roy. Ie voudrois donc bien que quelqu’vn dit
à ma bonne maman, qu’elle le chassat, elle ne me
croiroit pas si ie luy disois.

Monsieur. Ny moy aussi, & ie n’ay pas garde de luy
dire, mais Sire, i’ay peur que nous ayons trop demeuré
ensemble & qu’on ne se doute de quelque
chose.

Le Roy. I’en ay peur aussi.

Monsieur. A Dieu donc, mon petit papa, si vous
ne dittes pas ce que ie vous ay dit, ie vous diray
vne autrefois tout ce qui se passe.

Le Roy. S’il ne se dit que par moy, sçaches qu’il
ne se sçaura pas, ie suis aussi secret que toy, & ie
sçay bien me ressouuenir de tout, sans rien dire,
A Dieu.