& fait sonner bien haut la manutention de l’authorité
Royale : Il conclut qu’il alloit de la gloire
de cette authorité, de reduire les rebelles (car c’est
ainsi qu’il nomme les plus affectionnez au seruice
du Roy, & ceux qui s’opposent à ses desseins) & ne
leur accorder que ce qui ne leur pourroit estre refusé,
dautant que si le traitté que l’on desiroit faire
leur estoit auantageux, ils s’en preuaudroient
infailliblement, & seroit causé qu’ils remuëroient
à la premiere occasion, qu’à cét effet il ne trouuoit
pas à propos, que les Deputez qui seroient enuoyez
fussent ouys, à moins qu’ils portassent parole
& asseurance, que tous estoient disposez de
suiure de point en point les volontez du Roy. Sur
lequel auis sa Maiesté dit, qu’elle trouuoit tres-raisonnable
que son authorité fut maintenuë, mais
qu’elle seroit bien aise que l’on donna ordre à faire
cesser les plaintes qu’elle entendoit chaque
iour de ses pauures Subjets pillez & ruinez par les
gens de guerre, qu’elle auoit peine à croire que
tous ceux qu’on luy figuroit comme ennemis le
fussent en effet qu’au reste elle vouloit entendre
les Deputez qui seroient enuoyez de la part
de Monsieur le Duc d’Orleans, Monsieur le
Prince de Condé, & de son Parlement, & qu’on
auisast aux moyens de pacifier les troubles, & de
remettre les choses en tel estat, qu’elle pût retourner
en sa ville de Paris.