semblable dans l’histoire de tous les Tyrans : Le
soupçon ou la crainte les a portez à des meurtres
infinis ; mais ils n’ont iamais voulu destruire que
leurs ennemis. Demandez lui que lui a fait Paris,
à qui Henry le Grand a pardonné le crime de la
Ligue ? que lui ont fait Sainct Denys, Charenton,
Lagny, Corbeil, &c. Que lui a fait toute l’Isle de
France, & la pauure Brie. Tous les Princes les deuoient
haïr par ialousie des loüanges qu’elles lui
donnoient, il y regnoit par amour auec autant
d’authorité que nostre Roy par sa puissance legitime :
la mesme Iustice qui lui aqueroit tous les
hommes les esloignoit du Cardinal Mazarin enuieux
de sa gloire & de son credit, & voila vn crime
qu’il falloit donc venger sur toute la France
qui se plaignoit de ce berger Estranger, comme
le Menalcas de Virgile en sa troisiesme Eclogue.

Ce nouueau venu, choisy mal à propos pour
garder le trouppeau de France, le trait deux fois en
vne heure, il le tarit, il luy oste le suc & le laict, il
sévre nos deux aigneaux, il s’ẽgraisse de leur nourriture,
& les met à la paille, & à l’herbe. Ce mauuais
seruiteur a corrompu l’innocence des enfans
de la maison, ils les exhorte à la chasse du loup, &
luy mesme est la veritable beste carnaciere qui