L’ENTRÉE POMPEVSE
& magnifique du Roy LOVIS XIV. de
ce nom, en sa bonne Ville de Paris.

 

PARIS reuoit son Prince enuironné de
Palmes,
La tristesse est bannie, & les esprits sont
calmes,
Chacun voit à present l’effet de son desir,
La Seine dans son lit murmure de plaisir,
Et ses flots de cristal, d’vne course pompeuse,
Vont publier par tout cette nouuelle heureuse.
Echo, fille de l’air, qui n’a plus que la voix,
Qui cherche les rochers & la fraischeur des bois,
Qui dans les lieux obscurs fait tousiours sa retraitte,
Qui vit sur les costaux, & qui n’est point distraitte
Par les aymables chants des bergers resioüis,
Repete plusieurs fois le beau nom de LOVIS.
Le peuple est affranchy de toute inquietude.
Le Louure qui passoit pour vne solitude,
Commence d’esclairer au gracieux retour
D’vn Soleil de Iustice, & d’vn Astre d’amour,
Ce Roy seme par tout les traits de la lumiere,
Le Soldat vigilant fait garde à la barriere,
La pompe desormais vient habiter ces lieux
Qui rauissent les sens par la porte des yeux.
On voit mille cheuaux qui semblent d’allegresse
Bondir sous les fardeaux d’vne Illustre Noblesse.

page précédent(e)

page suivant(e)