sans impieté l’on peut dire de vous, Ego sum,
Oüy, Sire, c’est vous qui l’auez dit le premier,
point de Mazarin, vos paroles doiuent operer
ce qu’elles signifient, & nous sommes rauis
d’aprendre cét Arrest par vostre bouche, de l’apprendre
par vos Declarations si souuent reïterées,
Peuples n’en doutez plus, c’est le Roy qui
l’a dit.

Mais, SIRE, vostre pauure peuple de Normandie,
qui a porté tant d’imposts & de subsides
depuis tant d’années pour subuenir aux necessitez
de vostre Estat, a esté rauy de ioye
quand il a appris que vostre Majesté auoit dessein
de s’acheminer en cette Prouince, sous l’esperance
qu’il auoit de posseder quelques iours
vostre sacrée Personne, & que luy faisant voir
à l’œil ses miseres publiques, elle y apporteroit
quelque sorte de remede : Mais, SIRE, quand
elle a appris par mesme moyen que le Cardinal
Mazarin estoit encore à vostre suitte, sous sa
qualité de premier & principal Ministre, elle
s’est escriée,vsquequo Domine irasceris in finem,
on a crié, sauue, sauue, tout est perdu : & apres
vn examen mur & serieux, & pezé au poids du
Sanctuaire, on a bien veu que par vne suitte