d’auantage, en affaires plus serieuses & importantes
pour le bien de vostre pauure Royaume, & le salut
de vostre ame, qui est au fait de la Iustice : vne partie
prouenante de vostre part, l’autre de vos Officiers &
Conseillers : A quoy vous pouuez remedier, & faute
de le faire, vous demeurez coulpable de tout le
mal deuant Dieu, lequel y est grandement offensé,
& en receuez dés à present vn tres-grand blasme.

Il est tres-certain & personne ne le peut nier, que
la iustice & le bon Prince sont relatifs & inseparables :
& que deslors qu’vn Prince entre au gouuernement
de son Estat, il demeure chargé de rendre
vne bonne & sincere Iustice à ses suiets, laquelle
seule donne le nom au Royaume : de telle sorte que
le pays où iustice n’est point exercée, n’est par vn
Royaume, ains vn brigandage. Ce que dit fort bien
sainct Augustin au quatriesme liure de la Cité de
Dieu. Qu’est-ce autre chose, dit-il, des Royaumes
sans iustice, sinon de grands larcins & voleries ? Car
les voleries mesmes, que sont elles sinon de petits
Royaumes ? Et n’y a rien qui face mieux la difference
des Royaumes conquis d’auec les voleries, sinon la
iustice. C’est ce que Demetrius le Pyrate respondit
à Alexandre le Grand, lequel le reprenoit de ses larcins,
& luy demandoit quelle cause le mouuoit de
rauager & voller les passans sur lamer : Le mesme
desir, dit-il, me pousse à faire mes pillages &
conquestes, qui m’a meu & incité à guerroyer
tout le monde, pour le conquerir : mais d’autant
que ie suis vn petit compagnon, & que ie fais
mes conquestes auec vn petit equipage de vaisseaux
on m’appelle l’arron & pyrate : & toy faisant
comme moy, & volant les autres auec plus de puissance,
& vn plus grand appareil de vaisseaux, on
t’appelle Roy & Empereur. Et certainement il n’est