Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
24. Ian.
Le Lundy ne doit estre obmis Qu’on sceut qu’en Bretagne vn Commis De Monsieur de Mesleraye N’auoit remporté qu’vne baye Ayant demandé six milliers, Tant Fantassins que Caualiers. Que la Cour n’auoit fait response Sur la demande de ce Nonce ; Ains deffendu que Chef aucun Leue Soldats ne fust-ce qu’vn, Pour Monsieur de la Mesleraye Contre qui saigne encor la playe Et le trou qu’il fit au jabot D’vn crocheteur, veut que Chabot Qui sous main leuoit gens de Guerre Ait à dénicher de la terre, Et cependant qu’aux droicts Royaux Soit rejoint le droict des billots.
25. Ian.
Le Mardy le sieur la Raillere Fut pris en noüant sa [1 mot illi.] Et mené comme vn espion. L’on ne cognoist que trop son nom, Il est Monopoleur en diable, Autheur de la taxe effroyable Par qui tant de gens sont lesez Dessous le faux tiltre d’aisez, Il fut coffré dans la Bastille Et fit penitence à la Grille.
26. Ian.
Le Mercredy l’on eut aduis Que Messieurs de Lyon rauis Faisans des accueils fauorables A tous nos Arrests equitables ; Retinrent les gens que pour vous A menoit vn Duc contre nous Le grand Schomberg qui prit Tortose Et qui pourroit faire autre chose Que de seruir la passion D’vn prodige d’ambition.
27. Ian.
Ce iour nous eusmes asseurance Qu’vn mouchard de son [3 lettres. ill.]nence Vint les Chartrains questionner S’ils se vouloient Mazariner : Que Chartres entrant en fredaines Respondit vos fiévres quartaines, Allez chien d’espion au grat ; Iugez s’il retourna bien fat, La ville en estat s’estant mise De se garantir de surprise.
Deslors vn Regiment botté Qui n’en estoit pas mois crotté Sortit du costé de la Brie, D’où vint à nostre Boucherie Le lendemain mouton & bœuf, Que ce beau Regiment d’Elbeuf, Ensemble des bleds & farines Amena des villes voisines, En aussi grande quantité Qu’à Paris il en ait esté.
Ce mesme iour chemin facile Fut fait des Faux-bourgs à la Ville, Comme de la Ville aux Faux-bourgs. Les iours estoient encor tres-cours, Mais cela ne fit point d’obstacle Qu’vn second fils second miracle Ne le iour du precedent du suc De Monsieur son pere le Duc De la Duché de Longueville, Né dis je dans l’Hostel de ville, Ne fut à sainct Iean baptisé, Autrement Christianisé, Ayant la Ville pour Maraine, Madame de Boüillon Paraine ; Car ie n’ose dire Parain, Puis que c’est vn mot masculin : Et que ce fut Dame la ville Qui tint le jeune Longueville,
|