son Fauory Hephestion ; lors qu’estant sur le point de
faire passer par les armes vn pauure soldat qui auoit refusé
de salüer ce Mignon en passant, il ne peut iamais
estre flechy dans ce dessein qu’il auoit iusqu’à ce que ce
soldat se fut auisé de le suplier de ne faire point mourir
Alexandre, car c’estoit son nom. Hephestion esmeu
par le nom qu’il respectoit mesme en la personne d’vn
soldat insolent, suplia son maistre de ne donner point
vn mauuais presage au succés de ses armes, par la punition
de celuy qui portoit vn mesme nom que luy :
Et cette suplication acompagnée de ce motif fut si
puissante dans l’esprit de cet inuincible conquerant,
qu’apres en auoir exigé vne amende honorable qu’il
voulut receuoir luy mesme à cause du nom ; il commanda
à ce soldat insolent ou de quitter le nom qu’il
portoit ou de s’en rendre plus digne, vel depone nomen
vel te redde dignum nomine.

Que doit-on conclure de tant d’antecedents inuincibles,
si ce n’est qu’il faut peu de chose pour offencer
criminellement vn Prince du Sang ; & que les parolles
peu respecteuses & dites auec quelque emportement
de colere ou de manace, peuuent bien ou doiuent passer
pour des crimes d’Estat, puis que nos Roys mesmes
les plus iustes ont donné cette qualité à des interpretations
odieuses ; & que le manquement d’vn coup de
chapeau pour salüer vn Fauory, a esté censé par le plus