Anonyme [1649], LE MIROIR DES SOVVERAINS OV SE VOID L’ART DE BIEN REGNER, ET QVELLES SONT LES PERSONNES qu’ils doiuent élire pour estre leurs Commensaux, leurs Domestiques, leurs Seruiteurs, leurs Conseillers, & leurs Ministres d’Estat. QVEL EST LE DEVOIR DE TOVS ces diuers esprits; & quelle doit estre leur recompense. , françaisRéférence RIM : M0_2478. Cote locale : C_6_21.
-- 7 --
profit, ny de tendre qu’à leur gloire, & ainsi
les faire insensiblement arriuer à la fin qu’ils
se sont proposée, sans leur donner aucune connoissance
des mysteres de l’Estat, ny des merueilles
de leur extraordinaire conduite.
Contre les Flateurs.
En second lieu, le Souuerain est estimé tres
sage, lors qu’à l’exemple de Dauid, il deffend
l’abord de sa personne à ceux qui sont d’vne
vie tres pernicieuse, ainsi que les Flateurs, qui
par leurs mauuais conseils, peruertissent tout
à fait les plus excellentes qualitez du Prince.
Ce sont des bestes veneneuses qui empoisonnent
les meilleures constitutions, & que la
mesme Sagesse met au rang des reprouuez en
plusieurs endroits des sacrez cayers de l’Escriture
Sainte. Et certes la mort de l’ame n’est pas
plus à craindre que les inspirations de ces demons
incarnez, & de ces horibles Eumenides.
Bien que ce soient des Cameleons qui prennent
toute sorte de couleurs hormis la blanche ;
des esprits qui sont l’office des furies infernales ;
des guespes qui mangent le miel
des auettes ; des faux escus qui n’ont que le lustre
& la splendeur de l’or, des poux affamez
qui fuyent les morts, si tost que le sang qui
Anonyme [1649], LE MIROIR DES SOVVERAINS OV SE VOID L’ART DE BIEN REGNER, ET QVELLES SONT LES PERSONNES qu’ils doiuent élire pour estre leurs Commensaux, leurs Domestiques, leurs Seruiteurs, leurs Conseillers, & leurs Ministres d’Estat. QVEL EST LE DEVOIR DE TOVS ces diuers esprits; & quelle doit estre leur recompense. , français Référence RIM : M0_2478. Cote locale : C_6_21.
|