merite auec la grace. On peut donner equitablement
à l’vn, & refuser iustement à l’autre ;
il faut donner à l’homme de bien, qui par sa
misere n’a pas moyen de se maintenir en la dignité
où sa vertu la mis : & refuser à ceux qui ne
se plaisent que dans l’iniquité, & qui ne viuent
que dans l’infamie. Ce n’est pas qu’on les doiuent
absolument priuer de quelque espece de
grace : veu que Dieu, qui n’espere aucune recompense
des dons qu’il confere à ses creatures,
ne laisse pas de faire du bien aux reprouuez,
& de rendre leurs terres grandement fertiles.

Qui plus est, tout le monde peut estre deçeu
en ses iugemens ; & il nous est bien difficile de
pouuoir bien discerner, quand, & comment, &
mesme enuers qui on doit estre liberal, afin de
pratiquer ceste vertu, selon les loix Diuines, &
humaines ; puis que la liberalité procede d’vn
cœur libre, courtois, iuste, & raisonnable. Le
bien faire, est de tout temps, de tous lieu, &
de toute saison, lors qu’on trouue vn homme
qui en est digne. Tibere est extremement recommandable
pour auoir pratiqué longuement
ceste vertu, & pour auoir fait beaucoup
de bien à plusieurs personnes. Il donna les
biens d’Emilia Musa, femme fort riche, & decedée