auec tant de vigueur, estoient dans l’impuissance
de m’y faire tomber : & à la veille de ma plus grande
decadence, que i’estois enfin dans les approches
de mon plus grand bon-heur. Si ce succez
merite qu’on me déchire publiquement, qu’on
me fasse passer pour vn homme sans teste, pour
incapable de gouuerner vne haute fortune, ie ne
sçay s’il se pourroit iamais trouuer d’assez forts
genies dãs l’idée de ceux qui sont de ce sentimẽt.

Que diront donc ceux qui me blasment si ouuertement,
si malgré les iniustes sentimens qu’ils
ont des deuoirs d’vn premier Ministre j’adiousterois
encore, qu’il est de sa Politique d’exciter
quelquefois des orages, afin de les calmer puis
apres auec plus de gloire ; & de s’exposer mesme à
des dangers dont les resources sont apparammẽt
impossibles, afin de donner, en les trouuant, des
preuues de sa suffisance, de mesme qu’en entreprenãt
contre l’aueu des autres Ministres il a donné
des marques de son authorité. Ne peux-ie pas
m’estre comporté de la sorte dans ceste occasion ;
& n’a t’on pas raison de dire en suitte de son succez,
que i’en ay eu le dessein ; quoy que mes ennemis
preschent hautement que i’ay esté le plus
heureux homme de mon temps, la plus furieuse
imprudence du monde : & que j’ay survescu à l’éuidence
d’vn peril où le Ciel deuoit m’abandonner,
en vengeance de ma temerité.