Cependant M. le Prince est en estat de ne pouuoir
point estre condamné, que par ceux qui pretendent
auoir raison de iustifier le restablissement du Mazarin :
& son armement quelque trouble apparant qu’il
ait apporté dans l’Estat, ne choque neantmoins point
le repos des peuples, s’il est vray toutefois qu’il doiue
estre interessé comme on ne pretend que trop iustement,
par le retour de ce Ministre. Pour moy ie
confesse bien franchement, que lors que ce Prince
fit le mécontent ie me defiay de quelque secrete entreprise,
à laquelle ie croyois en quelque façon qu’il
faisoit seruir de pretexte l’aprehension du retour du
Mazarin que ie ne iugeois pas possible ; mais l’éuidence
de ce que ie voy, & dont ie pleureray peut-estre
vn iour les suites, & m’oblige de iustifier toute
sa conduite, & de témoigner à la gloire de sa reputation
& de l’innocence de ses intentions épurées de
toute sorte d’interest, qu’il n’a leué l’estendart que
pour le maintien de la liberté des peuples ; & qu’il
n’a iamais reculé à aucune sorte d’acommodement,
pourueu qu’on ostast toutes les dispositions qui se faisoient
secretement en Cour pour le rétablissement de
Mazarin.

Ainsi quelque contraire que i’aye paru iusques à
present à son party, ie suis maintenant contraint de
témoigner à son aduantage qu’il est le plus iuste ; &
qu’il est en estat de ne pouuoir plus estre condamné,
que lors qu’on n’aura plus aucune raison de croire,
apres l’esloignement de ce Cardinal, qu’il n’y aura
plus d’apparence pour son restablissement : car si la
Cour s’imaginoit encor qu’elle peut pleinement satisfaire