Secondement, par ce que tous les Parlements
qui entraisnent auec eux toutes les grandes
villes du Royaume sont engagez contre le
Mazarin, non pas seulement par la raison de
sa tyrannie & de son mauuais gouuernement
qui est abominable à tout le monde, mais
encores par le nombre des Arrests qu’ils ont
tous prononcez contre luy.

Tiercement, le public est fortifié par la Declaration
du Roy verifiée ; qui fait qu’il n’y a
point d’authorité ny de puissance qui ne l’assiste
dans cette glorieuse occasion.

Finalement, c’est vn faire le faut, & l’on ne
peut trouuer de repos que dans l’aneantissement
de l’ennemy commun, il n’y a que la defaitte
du Mazarin qui puisse ramener le calme
à l’Estat, & rendre la seureté publique. C’estoit
la Preface de Caton dans tous ses aduis, dans le
Senat Romain, il nous faut, disoit-il, tousiours
destruire Cartage, ou Cartage nous ruinera,
de mesme si nous ne perdons Mazarin, Mazarin
nous perdra, si bien que tous les veritables
François ne peuuent pas s’exempter sans
encourir le blasme de la posterité de se declarer
hardiment contre les Mazarins, en prenant
des resolutions vigoureuses, il sera impossible