Il est donc important pour sauuer nostre reputation
& la sincerité de toutes nos procedures,
dans la creance des peuples, de leur tesmoigner
par le banissement de celuy qu’ils regardent
comme le boutefeu general de toutes les
dissentions de l’Europe, que nous n’auons iamais
esté complices de ses pernicieux desseins ;
& que bien loing de nous entendre secretemẽt
auec luy, lors que contre nos ordres il s’opposoit
à ce grand bon heur, nous n’auons iamais
eu de plus sincere passion que celle de vuider
tous nos differents auec nos voisins par la conclusion
irreuocable d’vn bon & solide traité.

VIII. Ces raisonnements ne souffrent point
de replique. Mais si nous entendons la politique,
& si nous sommes passionnez pour vn veritable
repos, celuy que ie m’en vay deduire ne
nous permetra iamais, de souffrir le Cardinal
Mazarin, quelque grande que soit l’authorité
qui le protege.

La premiere maxime des Estats qui veullent
establir vne solide tranquillité dans le cœur de
leurs Monarchies, ne consiste pas tant à se mettre
à couuert des attaques de leurs ennemis
estrangers, qu’a mesnager si adroitement l’administration
de leurs affaires, que les broüillons
mesmes puissent manquer de pretexte, pour
en apuyer la iustice pretenduë de leurs remuements ;