Il eust fallu emprunter, vendre,
Mourir de faim, ou s’aller pendre.
Mais grace à tous ces bons Esprits,
Nous ne sommes point là reduits ;
Les sols, les deniers pesle-mesle
Tombent sur nous comme la gresle,
Quand quelque chose de nouueau
Vient de chez nous, ou du Bureau :
Disons plustost comme la neige
Qui depuis cinq mois nous assiege.
Mais en cherchant mon compliment,
Ie m’égare insensiblement,
Ie ne sçay ce que ie veux dire,
A grand’peine le puis-je escrire ;
Les beaux mots, le raisonnement
Manquent à mon Remerciement.
Helas ! si j’estois fils d’Apostre,
Ma foy j’en vaudrois bien vn autre ;
Ie n’aurois pas tant de tintoin
A trouuer les mots au besoin :
Bon chat, bon rat, vaille que vaille,
Combattons d’estoc & de taille,
Prenons la science au collet
Ainsi que l’on fit Corolet,
Lors qu’en habit de Capitaine
Il crioit à perte d’haleine
Dans toute la court du Palais,
Que le peuple vouloit la paix.
Helas ! ce grand homme de guerre
Fut quasi renuersé par terre,

Page précédent(e)

Page suivant(e)