puissance que vous leur pouuez opposer, ou
bien encore plus aisément en ne refusant point
le seruice des peuples qui se viennent offrir à
vous, & qui ne vous abandonneront iamais,
apres tant d’affections que vous leur auez tesmognez.
Et vous, ô admirable Senat, qui ne
cedez en rien à celuy que Rome auoit autrefois,
dont vous auez pris & la place & l’authorité,
ne doutez point de vous resoudre auiourd’huy
de nous accorder ce que nous demandons de
vous, vostre Vnion ne sera point deshonorée de
celle des Princes & de la nostre, car estant toutes
vnies ensemble, & les Princes du sang estant secondez
de vous & de nous, qui pourra resister à
tant de forces, & à de si grandes puissances ? De
là, combien se pourra-t’il ensuiure de belles
actions & de glorieux triomphes, que nous offrirons
tous ensemble à nostre ieune Monarque,
puis que c’est sous ses enseignes que nous combattons.
La melancholie & l’humeur Saturnienne
qui possede cette incompable Ville, se
trouuera dissipée tout en vn moment, & au lieu
de ce nom ingrat que nous prononçons mille &
mille fois tous les iours, & en la place des discensions
qui nous sont auiourd’huy familieres,
nous n’entendrons plus que des cris de resiouïssance
& de Viue le Roy parmy nous.

FIN.