dans cette haute dignité, que vos predecesseurs
vous ont prescripte ; à laquelle il semble que vous
ayez terny l’esclat en acquiesçeant au Conseil pernicieux
des seducteurs, & destructeurs de vostre
Royaume, qui ne se peuuent maintenir qu’en le
ruynant, eclipsant par ce moyen la plus belle marque
de vostre Royauté ; (qui est la Iustice) par
ce qu’ils sçauent bien que si elle reprenoit son
credit, & exerçoit ses fonctions ils seroient les premiers
à subir les peynes que ses Loix ordonnent
pour le chastiment des pestes publiques.

Herodote recite de bonne grace que le Roy Cambize,
sçachant au vray, qu’vn de ses Partisans,
estoit coulpable du crime de concussion, le fit escorcher
tout vif, & tapisser de sa peau la chaize
où son fils debuoit presider comme successeur legitime
de sa Charge. (SIRE) Vostre Majesté à l’exemple
de ce Grand Monarque, en faisoit de mesme,
leurs fils ne leur succederoient jamais ! Car ils
seroient punis de mesme que leurs peres. Et ce celebre
Parlement de Paris le plus Auguste Senat de
l’Europe occuperoit le siege de cette Diuine Themis,
tapissé non pas de la peau de ses concussionnaires
(par ce qu’ils ont en horreur Lanatheme)
mais de ses Illustres Fleurs de Lys dont l’odeur doit
dissipper la tristesse de tous vos sujets enseuelis
dans le tombeau de leurs calamitez.

Reuenez ô beau Soleil de nos iours pour chasser
l’ennuy qui nous accable depuis si long-temps, &
releuer nos esperances abantuës ? Toute la France
est remplie du bruict des rares vertus qui vous accomplissent,
& de la generosité qui prit place de
vostre cœur à mesme temps vous jouystes de la lumiere :
Si-bien que comme vn autre Andremede
exposée au monstre qui la deuore elle vous attend
comme son Illure Persée pour l’en deliurer ; & pour