mais par faute des masles : cette faueur cessant
par leur mort, deuoit cesser l’exclusion des filles :
Edoüard disoit, que la Loy Salique par ces termes
anciens de sa premiere constitution, excluoit
les filles, mais non les fils des filles : la Loy
par ces paroles ne l’exprimoit point : que l’intention
de la Loy n’estoit sinon pour donner aux
François vn Roy masle, le fils de la fille peut suppléer :
Philippes de Valois soustenoit, que les
masles issus des masles pouuoient seuls succeder
à la Couronne : la fille est excluse non pour vn
temps, mais à iamais : tout ce qui peut naistre
d’vne tyge incapable est de mesme nature, la
priuation ne vient iamais à l’habitude. Les
Estats assemblez donnerent leur Arrest, que Philippes
de Valois estoit seul le legitime Roy
Edoüard obeїt & luy fit hommage : depuis se
voulant rebeller, Dieu manifesta par l’issuë
combien iuste estoit l’Arrest qui sert de Loy,
pour decider à iamais tous pareils differends.

Bartole, le Prince des interpretes de droict
traitte qu’apres la mort de Philippes, il y eust
contention entre ses enfans, dont l’vn estant ne
auparauant que Philippes fut Roy, & l’autre depuis
ce dernier soustenoit que la Couronne luy
appartenoit comme au fils du Roy, le premier
ne pouuant estre fils de Roy, puis qu’il estoit né
auparauant que son pere fut Roy ; Mais par nos