Auant le blocus de Paris c’estoit le Dieu de l’Estat :
Il n’y auoit que l’enuie qui luy peust contester
pour lors, ces sept qualitez sus nommées, dans leur
plus parfaite moderation ; mais l’enuie n’est que
l’ombre de la vertu. Apres le siege la haine a changé
les iugemens, parce qu’elle a alteré les imaginations,
dans ceux qui ne reglent leurs iugemens qu’à
l’interest.

Mais, sans flater le dé, quel fut le crime du Prince
de Condé dans ce siege. C’est sa trop grande passion
pour maintenir l’authorité Royalle : C’est sa
trop grande soumission aux ordres d’vne Souueraine :
Parlons franchement, luy qui estoit inuincible
se laissa vaincre par les larmes de la Reyne ; elle l’engagea
sa parole par les adresses de femme, & par les
charmes de souueraine ; sa parole engagée l’obligea
à la poursuite qui a causé toutes ses trauerses & les
nostres. Iusques-là ie ne voy point de plus grand
manquement que celuy de n’auoir point esté Prophete
pour preuoir les fautes de ce dessein.

Les autres disent, que si l’ambition de ce Prince
n’eut esté fort moderée, il n’y auoit pas plus loing de
luy à la souueraineté, que de sainct Germain à Paris :
i’en iuge autant, & auec moy tous les plus sensez :
Pourquoy est-ce donc qu’il ne se laissa point gaigner
à ce charme ? Parce qu’il n’est pas moins vainqueur
de l’ambition que de nos ennemis ; Parce qu’il vouloit
seruir non pas destruire son Roy. Il n’a donc
point esté mal heureux que d’auoir esté sujet d’vne
femme, ou de n’auoir peu desobeïr sans fonder le
soubsçon raisonnable d’vne ambition desreglée.

Laissons le Siege : Passons à son emprisonnement :