elle fait demembrer & écorcher tous
les iours la France, la peau de laquelle elle se
couure pour plaire d’auantage à ce brutal de
Mazarin : Elle ayme comme Semiramis vn
cheual & vn brutal, Quoy nos Lys seront ils
ainsi profanez, retire toy d’icy miserable, ne
vient plus mesler les abominables regles des
Turcs auec nostre Christianisme, va chercher
ailleurs vn autre proye, & ne vient plus ternir
la renommée de ces genereux François par
tes insolences perpetuelles. Tu te dis Cardinal
du S. Siege Apostolique, en fais tu aucune
fonction, non car dis moy, à quoy passe
tu les iours, à perdre l’vn, à oster la vie à l’autre,
est-ce là la fonction d’vn Cardinal ; Non, non
songe à toy, abaisse toy & t’humilie deuant
Dieu & deuant les hommes, autant que tu t’és
esleué, Regarde la main de ce grand Dieu pres
à lancer ses foudres sur ta malheureuse teste,
fais penitence afin que Dieu te pardonne toutes
tes pilleries & voleries, & qu’il ne te donne
point la mort eternelle, que tuas à iuste raison
meritée.

FIN.